Аляксандр Іванавіч Стасюлевіч — першы хлебароб-тысячнік

Пятнаццаты сезон у ААТ «1-я Мінская птушкафабрыка» рупліва працуе на хлебнай ніве камбайнер Аляксандр Стасюлевіч. Талент, адданасць сваёй справе, добрасумленнасць і працалюбства гэтага чалавека зрабілі яго сапраўдным лідэрам гарачай уборачнай пары. І невыпадкова, што апошнія пяць гадоў Аляксандр Іванавіч упэўнена заваёўвае званне першага хлебароба-тысячніка ў раёне. У гэтым годзе вопытны камбайнер стаў першым «тысячнікам» і ў Мінскай вобласці.
З гэтай нагоды прама ў полі Аляксандр Стасюлевіч прымаў віншаванні ад старшыні Мінскага аблвыканкама Барыса Батуры, які ўручыў камбайнеру заслужаную ўзнагароду — мільён рублёў. Падарункі, Граматы і Падзячныя пісьмы Аляксандр Іванавіч атрымаў таксама ад Мінскага райвыканкама, абкама прафсаюза работнікаў АПК, кіраўніцтва і прафкама ААТ «1-я Мінская птушкафабрыка». У мінулым годзе хлебароб на камбайне «Лексіён-540» намалаціў 3,4 тысячы тон зерня, у гэтым годзе пастараецца пераўзысці свой вынік і «узяць» чатырохтысячны рубеж.
— Аляксандр Іванавіч — таленавіты хлебароб, сціплы і добры чалавек, прыкладны сем’янін, — з гордасцю расказвае аб сваім работніку намеснік гендырэктара па сельгасвытворчасці ААТ «1-я Мінская птушкафабрыка» Міхаіл Жывулька. — Апошнія гады ён пастаянна значыцца ў лідэрах на рэспубліканскіх «Дажынках»: у 2007 годзе стаў пераможцам і атрымаў за гэта аўтамабіль ад Прэзідэнта Рэспублікі Беларусь. Чатыры разы займаў другое месца па краіне, два гады быў трэцім.
— Мой працоўны дзень пачынаецца ў 6 гадзін раніцы, у 8 — выязджаю ў поле. Жну да позняга вечара, пасля еду запраўляць палівам камбайн, — расказвае Аляксандр Стасюлевіч, які сёлета працуе без памочніка. — Ніякага сакрэту поспеху ў мяне няма, проста люблю сваю справу, працую на зямлі з 19 гадоў.
Пасля ўзнагароджання Аляксандр Іванавіч паспяшаўся прадоўжыць сваю працу. Увага журналістаў і прызнанне кіраўніцтва — гэта, канешне, прыемна, але ж у такую гарачую пару дарагая кожная хвіліна. Напружаная ўборачная не церпіць прастояў!

Святлана БАРАВІЦКАЯ.